मका लागवड: 8वर्षांत मक्याचा एमएसपी (MSP) ४३ टक्क्यांनी वाढला, हे पीक शेतकऱ्यांसाठी यंदाही फायदेशीर ठरणार !
गहू आणि तांदूळ नंतर मका पीक भारतातील तिसरे महत्त्वाचे पीक म्हणून विकसित होत आहे. पोल्ट्री क्षेत्रात मक्याच्या वाढत्या मागणीचा फायदा शेतकऱ्यांना होणार आहे.
गेल्या 8 वर्षात मक्याच्या किमान आधारभूत किमतीत (MSP) 43 टक्क्यांनी वाढ झाल्याचे केंद्रीय कृषिमंत्र्यांनी म्हटले आहे. यासोबतच मक्याचे उत्पादन वाढल्याने शेतकऱ्यांना मोठा फायदा झाला आहे. कुक्कुटपालन आणि इथेनॉल उत्पादनासह विविध क्षेत्रात मक्याच्या वापरासोबतच या पिकाची लोकप्रियता भारतातच नव्हे तर जगभरात झपाट्याने वाढत आहे. पिकांच्या विविधीकरण कार्यक्रमांतर्गत, सरकार विविध प्रयत्नांद्वारे शेतकऱ्यांना मक्याची लागवड करून उत्पादन वाढवण्यासाठी प्रोत्साहित करत आहे. शेतकऱ्यांचे उत्पन्न वाढवण्यासाठी हे पीक प्रभावी ठरू शकते. FICCI द्वारे आयोजित ‘इंडिया मक्का समिट-2022’ च्या 8 व्या आवृत्तीला संबोधित करताना तोमर यांनी हे सांगितले.
यंदाच्या खरीपात मक्याची लागवड शेतकऱ्यांसाठी ठरणार फायदेशीर सौदा, हे आहे मोठे कारण
तोमर यांनी मका क्षेत्राला चालना देण्यासाठी सरकारच्या पूर्ण सहकार्याचे आश्वासन दिले. ते म्हणाले की, शेती हा आपल्या देशाचा कणा आहे, जिने कोविड-19 सह प्रत्येक संकटात देशाला मदत केली आहे. कृषी उत्पादनांच्या निर्यातीतही उत्साहवर्धक वाढ झाली असून, त्याचा आकडा सुमारे चार लाख कोटी रुपयांवर पोहोचला आहे. भारतीय कृषी क्षेत्राच्या महत्त्वाच्या भूमिकेबद्दल बोलताना ते म्हणाले की, सध्याच्या रशिया-युक्रेन संकटाच्या काळात सरकार जागतिक मागणी पूर्ण करण्यासाठी गव्हाची निर्यात सुनिश्चित करण्यासाठी काम करत आहे.
आपल्या शेतकऱ्यांनी उत्पादित केलेल्या गव्हातून जगाची गरज भागवली जात आहे
आपल्या शेतकऱ्यांनी उत्पादित केलेल्या गव्हासह इतर कृषी उत्पादनांचा जगाच्या गरजा भागविण्यासाठी वापर केला जात आहे, ही आपल्यासाठी अभिमानाची बाब असल्याचे कृषिमंत्री म्हणाले. कृषी क्षेत्राला बळकट करण्यासाठी मोठ्या प्रमाणावर गुंतवणूक करणे आवश्यक आहे, त्यासाठी एक लाख कोटी रुपयांचा कृषी पायाभूत सुविधा निधी आणि कृषी संबंधित क्षेत्रांसाठी 1.5 लाख कोटी रुपयांहून अधिक पॅकेज दिले गेले आहेत. कृषी क्षेत्राच्या प्रगतीसाठी त्यात अत्याधुनिक तंत्रज्ञानाचा अवलंब करण्याची गरज आहे.
कांद्याचे दरात घसरण सुरूच, प्रश्न एकच शेतकरी जगणार कसा?
पीक विविधतेसाठी मका हे उत्तम पीक आहे
केंद्रीय मंत्री म्हणाले की, आजच्या काळानुसार उद्योग आणि शेतकरी यांना एकत्र काम करावे लागेल, जेणेकरून दोघांच्या गरजा भागवता येतील. त्यामुळे शेती व शेतकऱ्यांना मोठा फायदा होणार आहे. रोजगाराच्या नवीन संधीही निर्माण होतील. FICCI च्या राष्ट्रीय कृषी समितीचे अध्यक्ष आणि TEFE चे समूह अध्यक्ष टी.आर. केशवन यांनी यावेळी सांगितले की, अन्न आणि पोषण सुरक्षेच्या दृष्टीने मक्यामध्ये चांगली क्षमता आहे. पीक विविधीकरणाच्या बाबतीतही ते योग्य मार्ग दाखवते. त्याचबरोबर पावसावर अवलंबून असलेल्या भागातील शेतकऱ्यांचे, विशेषत: लहान आणि अत्यल्प भूधारक शेतकऱ्यांचे उत्पन्न वाढवण्यासाठी ते उपयुक्त ठरले आहे.
मका उत्पादनात बिहारचा वाटा ९ टक्के आहे
यावेळी बिहारचे कृषी मंत्री अमरेंद्र प्रताप सिंह म्हणाले की, मका हे जगातील सर्वात महत्त्वाचे पीक आहे. हे बहुतेक विकसनशील देशांना अन्न सुरक्षा प्रदान करते. गहू आणि तांदूळ नंतर हे भारतातील तिसरे महत्त्वाचे पीक म्हणून विकसित होत आहे. भारतातील एकूण मका उत्पादनात बिहारचा वाटा ९ टक्के आहे.
आंध्र प्रदेश, कर्नाटक, राजस्थान आणि महाराष्ट्रानंतर बिहार हे देशातील पाचव्या क्रमांकाचे मका उत्पादक राज्य आहे. भारतातील यूएस दूतावासातील कृषी व्यवहार मंत्री रोनाल्ड व्हरडांक म्हणाले की, आज उपलब्ध तंत्रज्ञानामुळे शेतकरी त्यांचे उत्पादन वाढवू शकतात. पोल्ट्री क्षेत्रातील मक्याच्या वाढत्या मागणीचा फायदा भारतीय मका क्षेत्राला होण्याची शक्यता आहे.
